Oppbygging av boka
For å ta min eigen medisin, tilnærmar eg meg bokskrivinga som ein innhaldsdesignar. Det betyr at eg må innhente innsikt fortløpande gjennom heile skriveprosessen. Samtidig ønskar eg å dele undervegs. Strukturen du ser under er ei overordna oversikt over slik eg trur det kan ende opp til slutt, men som vi alle veit kan det (og bør det?) enda opp heilt annleis når prosessen er over. Dersom du ser noko du likar, eller saknar noko, eller tenker at eg må intervjue deg eller teste innhaldet på deg eller studentane dine, ikkje nøl med å ta kontakt på susanne.egset@netlife.com.
Del 1: Innhaldsdesign
Kva er det?
Ein relativt ny fagdisiplin, men eit handverk så gamalt som tid. Vi går inn på brukaroppleving, brukarorientert design, designtenking, innhald først-prinsippet, tverrfagleg jobbing og innhald som ein del av merkevaren.
Del 2: Innsikt
Korleis gjere det?
Kartlegging av mål, målgrupper og brukaroppgåver. Andre teknikkar for å skaffe innsikt som brukartesting, tenestesafari, kundereisekartlegging, spørreundersøkingar, intervju, medlytt.
Del 3: Designprosessen
Kva er fasiten på ein god designprosess? Neida. Det finnast ingen fasit, men mange gode tips - særleg for å ivareta brukaroppgåver, mål og innhaldet frå A til Å.
Stikkord er tverrfagleg samarbeid, korleis vi kan utfylle kvarandre - og brukar kjernemodellen for å kome raskt i gang med det viktigaste (som er innhaldet).
Del 4: UX-skriving
Mmmmikrotekst med meir!
Vi behandlar tekst som samtale, lærer å skrive for digitale brukergrensesnitt i t.d kjernesider, mikrotekstar og hjelpeinnhald. Alt i samanheng med psykologien bak kvifor folk oppfører seg som dei gjer på internett.
Del 5: Testing og forvaltning
Frå brukartest og intervju til innhaldsanalyse og mikrotest via alt innimellom.
Velg og vrak blant metodikkane for brukartesting ut frå kva som er hensiktsmessig for prosjektet ditt. Få også tips og råd til forvaltning og vedlikehald av innhaldet.